Haraldur Benediktsson, þingmaður Sjálfstæðisflokksins, hyggst ekki gefa kost á sér sem varaformaður Sjálfstæðisflokksins á næsta landsfundi, þrátt fyrir áskoranir þar um. Þetta segir hann á Facebooksíðu sinni. Hann segist taka þær áskoranir sem viðurkenningu fyrir sín störf, en eftir að Þórdís Kolbrún R. Gylfadóttir, ferðamála-, iðnaðar- og nýsköpunarráðherra hafi lýst yfir framboði sínu hafi honum ekki fundist rétt að keppa við hana:

„Ég hef sagt það vera taktlaust að miðaldra karl færi að keppa um slíkt við konu, sem er þar að auki vinur og félagi úr sama kjördæmi. Einstakling sem hefur alla burði til að vera framtíðarleiðtogi Sjálfstæðisflokksins, ef þannig vindur fram.“

Þá minnist Haraldur á það, að hann hafi lagt það til við Bjarna Benediktsson í janúar, að Þórdís væri álitlegra ráðherraefni en hann sjálfur:

„Hef lært að pólitíkin er ekki fyrirsjáanleg og kemur stöðugt á óvart. Hef líka tekið þátt í að hún sé ekki alltaf fyrirsjáanleg líkt og tillaga min við formann flokksins í janúar um að Þórdís Kolbrún væri ráðherraefni frekar en ég þó hún væri í 2 sæti listans í NV kjördæmi. Þá höfðu Sjálfstæðismenn þar unnið frækilegan sigur í haustkosningum 2016.“

Þá lýsir Haraldur yfir eindregnum stuðningi við Þórdísi:

„Það er ekki flókið fyrir mig að lýsa enn og aftur yfir stuðningi við Þórdisi – nú til varaformennsku.

Tímin leiðir svo í ljós hver niðurstaðan verður og ekki síst mín framtið – en mörg verkefni bíða.“