Líkt og kunnugt er birtist Jóhannes Haukur á skjánum í síðasta þætti sjöttu þáttaraðarinnar af Game of Thrones, sem meðlimur ribbaldagengisins Brotherhood Without Banners. Nú hefur bandaríska Times gert sér fréttamat úr Twitter færslu leikarans þar sem hann er sagður hafa hugsanlega ljóstrað upp um endurkomu ákveðinnar persónu.

Jóhannes Haukur hefur staðfest og birt skjáskot af vef IMDB því til sönnunar, að persóna hans muni birtast á ný í næsta þætti af Game Thrones sem sýndur verður á sunnudag en persóna hans í þáttunum er hinn vígalegi Lem Lemoncloak.

Í grein bandaríska Times er fjallað um að Jóhannes Haukur hafi birt Twitter færslu og látið fylgja þar með með hlekk á grein Independent í þeirri grein er greint frá hugsanlegri endurkomu kvenpersónunnar Lady Stoneheart. Hafa margir velt því fyrir sér í kjölfarið að hugsanlega hafi leikarinn sagt aðeins of mikið með færslunni.

Jóhannes Haukur gantast hins vegar með þessar vangaveltur greinarhöfundar Times og birtir færslu á Facebook þar sem tekur á sig fulla ábyrgð:

„Maður skrifar eitthvað á Twitter og það eru settar saman kenningar og skrifaðar greinar í Time. Það eru hundruðir GoT aðdáendur á Twitter sem eru nú sannfærðir um að Lady Stoneheart sé að koma. Og ef ekki, þá er það MÉR að kenna,“

ritar hann en tjáir sig jafnframt á Twitter þar sem hann segist óttast að verða eltur uppi af æstum aðdáðendum ef að svo fari að persóna Stoneheart láti ekki sjá sig í næstu þáttum. Hann tekur þá einnig fram að hann honum finnist „mjög svalt“ að Times skuli gera sér fréttamat úr orðum hans.