„Ég var og hef verið meirihlutann af ævi minni í mikilli neyslu. Síðustu árin mín bjó ég bara á götunni. Það má segja að ég hafi verið orðin útigangskona.“
Þetta sagði Ásta Kristmannsdóttir í viðtali við Stöð 2 á síðasta ári. en hún tjáði sig aftur um málið í kvöld. Þá hafði hún dúxað í skrifstofubraut Menntaskólans í Kópavogi. Ásta hefur verið edrú í fimm ár og náði að snúa við lífi sínu eftir 30 ára vímuefnaneyslu. Áður svaf hún í athvörfum fyrir heimilislausa og á götunni. Það er því um mikinn viðsnúning að ræða sem hefur vakið mikla athygli og Ásta fengið mikið lof fyrir hvernig hún hefur náð að snúa við blaðinu.
Ásta hlaut styrk frá menntunarsjóði Mæðrastyrksnefndar Reykjavíkur. Í náminu fékk hún 8 í lögfræði, 9 í íslensku og 10 í tölvum og bókfærslu. Þá var markmiðið að verða viðurkenndur bókari. Það er nú að rætast en í samtali við Stöð 2 í gærkvöldi sagði Ásta að námið hefði bjargað lífi hennar og er hún einu prófi frá því að fá draum sinn uppfylltan. Segir hún afar mikilvægt að hafa sjóð sem þennan sem styrki konur til náms.
Ásta segir:
„Ég er núna að leita að vinnu og hlakka til að fara að vinna sem bókari. Þetta er starf sem ég hef haft áhuga á frá því að ég var krakki. Mér hefur gengið vel í þessu námi og ég hlakka til framtíðarinnar. Vonandi fæ ég vinnu sem fyrst.“
