„Ég mun kveðja borgarstjórn eftir 10 viðburðarrík ár, þakklát fyrir þá dýrmætu reynslu sem ég hef öðlast og stolt af þeim verkum sem ég hef fengið að koma til leiðar,“ segir Sóley Tómasdóttir borgarfulltrúi Vg. Frá þessu greinir hún á Facebook-síðu sinni. Sóley hefur verið áberandi í íslenskum stjórnmálum og umdeild nokkuð.
Sóley segir:
„Í haust ætlum við fjölskyldan að flytja til Hollands. Aart ætlar að færa sig til hollenska hluta Marel, ég ætla að fara í meistaranám í uppeldisfræði og börnin ætla að stúdera hollenska unglingamenningu.“
Þá segir Sóley ennfremur:
„Reykjavík er frábær borg og verður stöðugt betri. Vinstri græn eiga sinn þátt í því og munu halda áfram að stuðla að sanngjarnari, grænni og femínískari borg þó ég bregði mér af bæ. Sömu sögu er að segja af meirihluta borgarstjórnar, fjölbreyttum en samstilltum hópi sem ég vona að eigi eftir að vinna vel og lengi saman. Og fyrst ég er byrjuð, þá er minnihlutinn svo sem ágætur á sinn hátt og samstarf allra borgarfulltrúa að jafnaði gott.“
Sóley verður borgarfulltrúi fram á haust og kveðst ætla að leggja sig fram um að koma sem mestu til leiðar á þeim tíma.
„Og ég er auðvitað ekki hætt í pólitík. Hún mun alltaf fylgja mér – enda er lífið eitt pólitískasta viðfangsefni sem við tökumst á hendur.“