Mekka íssins er í Hveragerði og hafa höfuðborgarbúar lengi haldið í þá skemmtilegu venju að gera sér ferð austur fyrir fjall og fá sér bragðgóðan ís að hætti Hvergerðinga. Guðný Ingibergsdóttir, eigandi Gottís – Mæran, segir að hugmyndin að ísbúðinni hafi kviknað við eldhúsborð systur hennar og mágs í Hveragerði, líkt og margar aðrar góðar hugmyndir.

„Þá var engin ísbúð fyrir hér í bænum, eins ótrúlegt og það hljómar, þar sem Kjörís er bókstaflega framleiddur í túnfætinum,“ segir hún.

Úr Hafnarfirði í Hveragerði

„Við hjónin ákváðum að skella okkur á þetta spennandi tækifæri og fara út í rekstur ísbúðar. Ég, maðurinn minn Ingvar Már og börnin okkar tvö, fluttum úr Hafnarfirðinum og keyptum fallegt einbýlishús hér í Hveragerði. Fjölskyldan er mjög ánægð með búsetuna enda er einstaklega gott að búa í þessum góða bæ. Við opnuðum ísbúðina svo 21. apríl 2015 þannig að hún er bara rétt nýorðin eins árs.“
Guðný, sem er framreiðslumaður að mennt, og Ingvar Már, lærður matreiðslumeistari, festu kaup á sjoppunni Mærunni sem staðsett er við Breiðumörk 10 – í sama húsnæði og Hverabakarí var áður til húsa.

Ísinn að sjálfsögðu frá Kjörís

„Ísinn er að sjálfsögðu frá Kjörís og hefur Gottís verið tekið fagnandi af jafnt Hvergerðingum sem og ísbíltúrafólki sem kemur víða að,“ segir Guðný.

Hún vekur athygli á því að gaman sé að heimsækja blómabæinn Hveragerði enda hafi hann upp á að bjóða margvíslega afþreyingu og útivist fyrir fjölskylduna og dýrmæta nánd við náttúruna . „Og svo fæst náttúrlega besti ísinn hér, “ segir Guðný hlæjandi.

Gottís – Mæran
Breiðumörk 10
Hveragerði
Sími: 483-4879.
Opnunartími: 12.00–22.00.