Guðni með 65,6 prósenta fylgi – Davíð með 18,1 prósent
Guðni Th. Jóhannesson sagnfræðingur nýtur stuðnings 65,6 prósenta þjóðarinnar í embætti forseta Íslands. Þetta kemur fram í niðurstöðum nýrrar könnunar MMR um fylgi þeirra sem tilkynnt hafa forsetaframboð. Könnunin var gerð dagana 12. til 20. maí síðastliðinn.
Guðni heldur þar með mikilli forystu en hann var einnig með yfirburðafylgi í síðustu könnun MMR. Fylgi Davíðs Oddssonar mældist 18,1 prósent í könnuninni á meðan fylgi Andra Snæs Magnasonar mældist 11 prósent. Þá mældist fylgi Höllu Tómasdóttur 2,2 prósent. Aðrir frambjóðendur mældust samanlagt með 3,0% fylgi.
Þegar fylgi þriggja efstu frambjóðendanna var skoðað eftir samfélagshópum og stjórnmálaskoðunum kom í ljós að Guðni Th. Jóhannesson hafði hlutfallslega meira fylgi meðal kvenna og þeirra sem ekki studdu ríkisstjórnarflokkana. Aftur á móti hafði Davíð Oddson hlutfallslega meira fylgi meðal karlmanna, þeirra sem eldri voru og þeirra sem studdu Framsóknarflokk og Sjálfstæðisflokk. Andri Snær Magnason hafði hlutfallslega mest fylgi meðal þeirra sem yngri voru.
Úrtak: Einstaklingar 18 ára og eldri valdir handahófskennt úr hópi álitsgjafa MMR
Könnunaraðferð: Spurningavagn MMR
Svarfjöldi: 985 einstaklingar
Dagsetning framkvæmdar: 12. til 20. maí 2016