Vilhjálmur Bjarnason fyrrverandi alþingismaður og Ólafur Kristinsson lögmaður hafa stefnt athafnamönnunum Björgólfi Thor Björgólfssyni og Birgi Má Ragnarssyni og krefjast bóta. Er Björgólfi Thor og Birgi stefnt fyrir njósnir, brot gegn rétti til einkalífs, umsáturseinelti og brot á persónuvernd. Er stefnan lögð fram í kjölfar víðtækra persónunjósna sem fyrirtækið PPP stóð fyrir, að sögn á vegum Björgólfs Thors, árið 2012.

RÚV greinir frá þessu.

Fjallað var um njósnamálið á síðasta ári.

Björgólfur Thor sagður hafa borgað 33 milljónir fyrir njósnir gegn aðilum tengdum hópmálsókn gegn sér – „Ég er bara mjög sleginn yfir þessu“

Fyrirtækið PPP fylgdist með Vilhjálmi, Ólafi og fleiri aðilum sem voru aðilar að hópmálsókn gegn Björgólfi Thor í tengslum við fall Landsbankans. Meðal annars tók starfandi lögreglumaður þátt í njósnunum.

Björgólfur vildi hins vegar meina að hann hefði ekki greitt fyrirtækinu eins háa fjárhæð og haldið hefði verið fram og það hefði gengið miklu lengra en hann hefði nokkurn tímann beðið um.

Fram kemur í frétt RÚV að á þeim tíma sem njósnirnar fóru fram hafi Birgir Már verið framkvæmdastjóri félags Björgólfs Thors, Novator.

Vilhjálmur og Ólafur krefja Birgi Má og Björgólf Thor hvoran um sig um 66 milljónir króna í bætur auk dráttarvaxta.