Gunnar Smári Egilsson, ritstjóri Samstöðvarinnar, greinir frá alvarlegum heilsubresti í færslu á samfélagsmiðlum í dag. En hann er með blóðtappa á nokkrum stöðum í líkamanum.

„Ég verð ekki á Samstöðinni næstu daga, var sendur heim af lækni til að gera sem minnst. Ég er ekki beint veikur en svolítið bilaður, er með blóðtappa í fæti, lungum og hjarta og ekkert af þessu virkar sem skyldi, ég er því orkulítill og einhvern veginn þrjátíu árum eldri en ég var fyrir nokkrum vikum,“ segir Gunnar Smári í færslu.

Hann segir það skrýtna tilfinningu að vera ekki þjáður en samt alveg glataður á einhvern hátt.

„Ég hef alla tíð verið blessaður með öflugri vél innra með mér, hef getað gert allt sem mér hefur dottið í hug, jafnvel ráðist á ókleyfa múra. En nú er ég magnþrota gagnvart minnstu hindrunum, get ekki hugsað mig í gegnum neitt, ekki drifið nokkurn skapaðan hlut af,“ segir hann.

Í gær hafi staðið til að gefa honum stuð svo hjartað færi að slá með eðlilegum hætti. Það var hins vegar ekki hægt því það fundust blóðtappar í hjartanu. Þeir gætu stokkið upp í heila og valdið slagi. „g verð því að lifa sem maður á tíræðisaldri einhverja daga til viðbótar.,“ segir hann.