Raheem Sterling kom inn af bekknum og lék sinn fyrsta keppnisleik síðan í maí 2025 þegar hann þreytti frumraun sína fyrir Feyenoord.

Sterling, sem er 31 árs, gekk til liðs við hollenska félagið í síðustu viku eftir að hafa yfirgefið Chelsea eftir að hafa rift samningi sínum.

Honum var skipt inn á í gær á 61. mínútu þegar Feyenoord leiddi 2-1 gegn Telstar, sem urðu lokatölur leiksins.

Síðasti leikur hans áður en kom að þessum var á láni hjá Arsenal á lokadegi ensku úrvalsdeildarinnar á síðasta tímabili.

„Ég hef ekki spilað í smá tíma en hef reynt að halda mér í formi. Ég er að byggja mig upp skref fyrir skref og vinna mig upp í leikform,“ sagði Sterling eftir leik.

Stjóri liðsins, Robin van Persie, flutti æfingar tímabundið til Tubize í Belgíu til að Sterling gæti æft með liðinu á meðan beðið var eftir atvinnuleyfi í Hollandi. Eftir að leyfið fékkst gat hann svo leikið í gær.