Sóley Eiríksdóttir, sem naumlega komst lífs af þegar snjóflóðið á Flateyri árið 1995, hefur lagt fram formlegt erindi til Alþingis þar sem óskað er eftir sjálfstæðri og heildstæðri rannsókn á snjóflóðinu. Þetta kemur fram í aðsendri grein Sóleyjar á Vísi en þar segir hún það skjóta skökku við að hefja slíka rannsókn vegna snjóflóðsins á Súðavík, sem féll sama ár við sambærilegar aðstæður og með sambærilegum afleiðingum, en sleppa því að rannsaka hamfarirnar á Flateyri.
„Helstu rök sem nefnd hafa verið eru þau að aðstandendur hafi ekki kallað formlega eftir rannsókn.
Rannsókn á náttúruhamförum er ekki einkamál aðstandenda. Hún er hluti af ábyrgð ríkisins gagnvart borgurum sínum. Hún snýst um hvernig hættumat var unnið, hvernig ákvarðanir voru teknar og hvort fyrirliggjandi þekking var nýtt. Slík rýni á að byggjast á eðli atburðarins og afleiðingum hans, ekki á því hvort þolendur hafi burði eða þrek til að halda málinu lifandi í áratugi.
Ef rannsókn er réttlætanleg í Súðavík vegna manntjóns og samfélagslegra afleiðinga, hlýtur sami mælikvarði að gilda um Flateyri. Annað kallar á skýran og rökstuddan mun,“ skrifar Sóley.
Snjóflóðið á Súðavík féll þann 16. janúar 1995 og kostaði líf fjórtán íbúa. Snjóflóðið á Flateyri félll þann 26. október sama ár en tuttugu íbúar létust í flóðinu. Ein þeirra sem lést var systir Sóleyjar en sjálf lenti hún undir flóðinu en var grafin upp í tæka tíð.
„Sú reynsla veitir mér ekki sérstakan rétt umfram aðra, en hún undirstrikar hvers vegna ábyrgð ríkisins má ekki ráðast af því hvort þolendur knýi á um rannsókn eða ekki. Ríkið ber ábyrgð á að rannsaka atburði sem kostuðu mannslíf. Sú ábyrgð má ekki vera valkvæð. Þegar mannslíf tapast er rannsókn ekki valkostur heldur skylda. Ef sami mælikvarði á að gilda um alla verður hann að gilda um Flateyri líka,“ skrifar Sóley.
