„Ég segi ekki að þetta hafi verið erfitt en mér fannst þetta spes. Við vorum kannski mætt þarna mörg saman að horfa á fótbolta en eiginkonur leikmannanna voru mest að spá í það hvort veskið passaði við jakkann sem þær voru í. Í mínum huga var þetta skrítið og óskiljanlegt og mér datt ekki til hugar að taka þátt í þessu. En auðvitað höfðum við það gott og gátum leyft okkur að fara fínt út að borða en ég forðaðist glamúrgírinn.“

Þetta segir Helga Lind Björgvinsdóttir Pilates-þjálfari og fyrirsæta í áhugaverðu viðtali við Vikuna. Þarna lýsir hún lífi sínu með Arnari Gunnlaugssyni á Englandi er hann var atvinnumaður þar með Leicester. Arnar og Helga Lind skildu árið 2004 en hafa ávallt verið góðir vinir.

Skömmu eftir það kynntist Helga Lind öðrum íslenskum atvinnumanni í knattspyrnu, Gylfa Einarssyni, og eignaðist með honum tvíbura. Fæðing þeirra á Englandi, þar sem aðrar venjur gilda en hér um fæðingar, var sérstæð og erfið reynsla fyrir Helgu Lind. Um þetta segir meðal annars í greininni í Vikunni:

Algengt er að fjölburar fæðist fyrir áætlaðan fæðingardag en miðað við 40 vikna meðgöngu var settur dagur 26. janúar. Börnin komu hins vegar 23. nóvember, sama dag og Helga hafði verið í mæðraskoðun. „Mér brá rosalega því ég fann greinilega að ég var að fara af stað. Ég þekkti það af eigin reynslu. Ég ítrekaði við ljósmóður að síðasta fæðing hefði einungis tekið þrjá tíma þrátt fyrir að barnið hefði verið rúmar átján merkur. Mér fannst þær ekki taka mig alvarlega og síendurtók að ég vissi að ég væri farin af stað og að fæðingin myndi gerast mjög hratt. En þær fóru sér að engu óðslega. Eflaust fannst þeim ég móðursjúk en um leið og ég var skoðuð varð uppi fótur og fit. Þær báðu mig í ofboði að hringja í manninn minn en börnin voru bæði sitjandi svo að ég endaði í bráðakeisara.

Í ljósi þess að ég var í mæðraskoðun sama dag og ég fer af stað hefði ljósmóðirin auðveldlega átt að geta skorist í leikinn. Á Íslandi hefði ég líklega verið stoppuð en eftirlitið í Englandi er allt öðruvísi. Ég hugsaði ekki mikið um þetta meðan á ferlinu sjálfu stóð en eftir á að hyggja var ég svekkt. Þetta var svo mikill óþarfi.“ Helgu var svo að segja sparkað út af sjúkrahúsinu tæpum fjórum dögum eftir fæðingu barnanna. Hún segir upplifunina að koma barnlaus heim óraunverulega. „Ég var nýstaðin upp úr keisara og ég komst varla á klósettið sjálf. Við bjuggum í þriggja hæða húsi og mér fannst ég ósjálfbjarga. Fæðingarupplifunin út af fyrir sig var líka furðuleg og ólík fyrri reynslum. Mér fannst ég ekki búin að eiga því ég hafði ekki farið í gegnum fæðingarferlið og fór svo heim án barnanna. Á föstudagsmorgni var ég með tvö börn í maganum en á mánudeginum var ég komin heim með tóman maga. Ég var bara skorin og þau tekin frá mér. Þetta var öðruvísi upplifun, maður átti ekki fæðinguna.“

Helga Lind og Gylfi eru nú nýlega skilin og var sá skilnaður í sátt beggja. Eru þau góðir vinir í dag.