Nefnd um eftirlit með lögreglu gagnrýnir hluta rannsóknar lögreglunnar í Vestmannaeyjum á alvarlegri líkamsárás sem framin var á Þjóðhátíð árið 2024. Nefndin segir ljóst að upphaf rannsóknarinnar hafi verið annmörkum háð en er ekki tilbúin til að fjalla um rannsóknina að öllu leyti þar sem henni er ekki lokið.
Lögmaður þolanda árásarinnar kvartaði til nefndarinnar í september 2025. Í kvörtuninni voru gerðar athugasemdir við meintar ámælisverðar starfsaðferðir starfsmanna lögreglunnar í Vestmannaeyjum við rannsókn og málsmeðferð á alvarlegri líkamsárás sem þolandinn varð fyrir þann 4. ágúst 2024 en sá dagur var um Verslunarmannahelgina þetta ár. Í fyrsta lagi voru gerðar athugasemdir við að viðbrögð lögreglu í kjölfar og við rannsókn árásarinnar hafi verið ófullnægjandi. Í öðru lagi taldi þolandinn að meðferð málsins hafi dregist óeðlilega án fullnægjandi skýringa. Í þriðja lagi taldi þolandinn að samskipti við lögreglu hafi verið ófullnægjandi og ekki í samræmi við lög um meðferð sakamála.
Lögreglan í Vestmannaeyjum sendi nefndinni öll gögn málsins auk upptöku úr búkmyndavél lögreglumanns. Í svari lögreglunnar kom meðal annars fram að þegar tilkynning barst um málið hafi vinur þolandans lýst atvikum að því er virtist eftir honum. Hafi hann ekki séð atvikið sjálfur. Vinurinn hafi hringt í þolandann, sem hafi lýst atvikum. Þetta hafi verið um klukkan tvö aðfaranótt sunnudagsins 4. ágúst 2024 þegar ókunnugur maður hafi skallað hann og kýlt hann ítrekað í höfuðið. Þolandinn lýsti útliti meints geranda. Þessar lýsingar hafi hann gefið eftir að hann taldi sig hafa séð meintan geranda á tjaldsvæðinu í Eimskipshöllinni og tekið af honum myndband. Hafi vinur hans sýnt lögreglu myndbandið og bent á meintan geranda.
Svör lögreglu eru frá því í október 2025 en í því þeim kom fram að enginn sakborningur hafi verið skráður í málinu og enginn skýrsla tekin af meintum geranda. Það sé þó enn hægt að gera það, þar sem málið sé enn til rannsóknar.
Nefnd um eftirlit með lögreglu segir í sinni niðurstöðu um kvörtun þolandans að gögn málsins beri með sér að hann hafi orðið fyrir tilhæfulausri og alvarlegri líkamsárás sem beri að rannsaka í samræmi við lög um rannsókn sakamála.
Nefndin telur að upphafsstig rannsóknarinnar hafi verið annmörkum háð. Þar sem rannsókn málsins sé hins vegar enn ólokið sé þó ekki að svo stöddu hægt að leggja mat á hvort unnt sé að bæta þar úr. Þar af leiðandi telur nefndin ekki tilefni til að aðhafast frekar vegna kvörtunarinnar að sinni. Telji þolandinn tilefni til að beina nýrri kvörtun til nefndarinnar að rannsókn lokinni muni hún verða tekin til nýrrar afgreiðslu.
