Hann kveður fasteignabransann og ætlar að einbeita sér að þjálfun, bæði markþjálfun og einkaþjálfun.
Árni hefur vakið mikla athygli á samfélagsmiðlum undanfarið ár. Hann heldur einnig úti hlaðvarpinu Taboo með eiginkonu sinni, Guðrúnu Ósk Maríasdóttur, þar sem þau ræða hreinskilið og hispurslaust um sambönd, kynlíf og fleira.
Sjá einnig: „Það er munur á klámi og því sem við erum að gera“
Árni greindi frá þessu í færslu á Instagram.
„Það er komið að tímamótum í mínu lífi en ég hef látið af störfum sem fasteignasali. Ég er óendanlega þakklátur fyrir þann tíma og þá sérstaklega fyrir allt dásamlega fólkið sem ég aðstoðaði við að selja og kaupa draumaeignina sína,“ sagði hann.
„Ég er ennþá að klára nokkrar eignir og loka ýmsum endum en á nýju ári mun nýr kafli byrja. Aldrei að vita hvort ég snúi aftur að fasteignasölunni en eins og er þá er ég ótrúlega spenntur fyrir nýjum tímum.“
„Ég hef ákveðið að snúa mér aftur að þjálfun enda er það mitt passion í lífinu. Ég brenn fyrir það að hjálpa fólki að betrumbæta heilsu sína, hvort sem það er andleg heilsa eða líkamleg,“ sagði Árni.
„Ég er nú þegar byrjaður að markþjalfa og það gengur frábærlega! Andlega hliðin er eitthvað sem heillaði mig alltaf mjög mikið í þau 12 ár sem ég þjálfaði Crossfit og lyftingar og það er ótrúlega gaman að vera kominn með fleiri verkfæri í verkfæratöskuna mína svo ég geti aðstoðað fólk með þann part líka.
Á nýju ári mun ég líka byrja að bjóða upp á fjarþjálfun og einkaþjalfun og er sú vinna þegar farin af stað. Með mína reynslu sem spannar yfir áratug tel ég mig í stakk búinn að hjálpa hverjum sem er að bæta heilsu sína, andlega sem og líkamlega.“
Hann hvetur fólk til að hafa samband ef það hefur áhuga á að koma í þjálfun til hans.
