Dorrit Moussaieff, fyrrverandi forsetafrú landsins og eiginkona Ólafs Ragnars Grímssonar, lenti í þeirri leiðinlegu lífsreynslu í gær að vera rænd á götum Lundúna.

Dorrit greinir sjálf frá þessu í færslu á Instagram-síðu sinni.

„Ég var rænd!! farið sérstaklega varlega í London – glæpir eru alltumlykjandi!! gerendurnir eru á hjólum og fara á móti umferð sem er útpæld aðferð þar sem erfiðara er að elta þá. Þeir velja yfirleitt einstefnugötur,“ sagði Dorrit í færslu sinni.

Óvíst er hvort og þá hverju þjófurinn náði að stela af Dorrit en hún segir að lögregla hafi ekki náð að hafa hendur í hári viðkomandi. „Það er ekki séns í London en á Íslandi hefðu þeir náð honum á 10 mínútum.“

Dorrit segir að tönn í henni hafi brotnað í ráninu og þá sé hún aum í öxlinni.