„Þetta er bara smá grát­legt,“ seg­ir Sara Júlíusdóttir, nemandi á þriðja ár í grunnskólakennaranámi við Háskóla Íslands, í athyglisverðu viðtali í Morgunblaðinu í dag.

Þar lýsir Sara upplifun sinni af náminu og kallar eftir áherslubreytingum þannig að nemendur komi betur undirbúnir til starfa í skólunum að námi loknu.

Í viðtalinu segir Sara að of mikill tími fari í föndur og leiki en ekki sé nógu mikil áhersla lögð á það sem raunverulega skiptir máli.

„Mér finnst ég ekki búin að læra neitt í þessu námi sem mér finnst ég geta nýtt þegar ég fer að vinna við kennslu,“ seg­ir Sara í viðtalinu og bendir á að hún viti til dæmis ekkert um bekkjarstjórn eða einelti eða hvernig eigi að takast á við hegðunarvandamál.

„Við vit­um hvernig þetta er í dag, börn með grein­ing­ar, eins og ein­hverfu, fá ekki alltaf stuðning og kenn­ar­ar þurfa að tak­ast á við það. Við lær­um ekk­ert um það. Að nota Mentor, gefa ein­kunn­ir og búa til hæfniviðmið. Það er ekk­ert fjallað um þetta í nám­inu,“ segir hún meðal annars við Morgunblaðið.

Hún segist vissulega vilja læra alls konar skapandi greinar og fá hugmyndir um leiki, föndur og fleira. „En ég þarf ekki að gera það, ég þarf ekki að mæta í heil­an tíma og gera þessa hluti,“ segir hún við Morgunblaðið þar sem ítarlega er rætt við hana.