Samkvæmt lögreglunni á Spáni er talið að Diogo Jota hafi keyrt bílinn þegar hann lenti utan vegar með þeim hræðilegu afleiðingum að hann og bróðir hans létu lífið.

Atvikið átti sér stað síðasta fimmtudag en gögnin benda til þess að bílinn hafi verið vel yfir hámarkshraða.

Jota var framherji Liverpool og landsliðsmaður frá Portúgal en útför hans fór fram í heimalandinu á laugardag.

„Sérfræðingar eru enn að klára sína vinnu, það er verið að skoða slitförin sem eitt af dekkjum ökutækisins gerði,“ segir lögreglan í samtali við fjölmiðla á Spáni

„Það bendir allt til þess að ökutækið hafi verið á töluvert meiri hraða en leyfður er á þessum kafla á veginum.“

Lögreglan telur að Jota hafi keyrt bílinn en eins og fyrr segir eru sérfræðingar að klára rannsókn á málinu.

„Einnig bendir allt til þess að ökumaðurinn hafi verið Diogo Jota.“

„Þegar sérfræðingar hafa lokið sinni vinnu þá verða þau gögn send til dómstóla.“