„Ég var ungur farinn að glíma við kvíða þó það hafi ekki verið kallað því nafni þá,” segir Bergur Þór Jónsson, 53 ára faðir úr Borgarnesi. Bergur er nýjasti gestur hlaðvarpsins Sterk saman þar sem hann talar meðal annars um þunglyndi og kvíða.

Bergur hefur skrifað bók, er með heimasíðu og lifir í sátt og samlyndi við kvíðann sinn, svona oftast.

Í þættinum kemur fram að Bergur hafi alltaf verið með lítið sjálfstraust og langaði hann að flýja frá eigin huga.

„Ég man vel eftir því að drekka í fyrsta skipti og fann þá mikinn létti,” segir hann meðal annars og bætir við að unglingsárin hafi mikið snúist um djamm og sveitaböll. En honum leið þó alltaf djöfullega eftir drykkju.

„Ég eignaðist konu og börn. Lífið varð gott og venjulegt,” segir hann en um þrítugt náði þunglyndi og kvíði yfirhöndinni í lífi Bergs og hann ætlaði að binda endi á líf sitt.

„Ég hélt framhjá konunni minni, var búinn að taka allt of mikið af verkefnum að mér og mér leið eins og þetta væri eina leiðin út“.

Sem betur fer aðstoðaði konan hans hann, hann fór til læknis, sálfræðings og lærði að opna sig.

Viðtalið við Berg Þór má nálgast í heild sinni á öllum helstu hlaðvarpsveitum, til dæmis Spotify:

<