„Heiðrum merki þjóðarinnar og stjörnurnar og rendurnar sem sameina okkur öll. Þegar við sýnum þjóðfánann og hugleiðum þau gildi sem hann táknar, fögnum þá frelsinu, hugrekkinu og seiglunni sem gerir landið okkar stórt,“ sagði í færslu bandaríska varnarmálaráðuneytisins á samfélagsmiðlum á laugardaginn.

En á myndinni sem ráðuneytið deildi er svolítið sem margir telja líkjast rússneska fánanum.

Garry Kasparov, fyrrum heimsmeistari í skák og Rússi, er yfirlýstur andstæðingur einræðisstjórnar Pútíns og er ekki feiminn við að gagnrýna Pútín.

Myndin vakti athygli hans og skrifaði hann á X um málið: „Var bandaríska varnarmálaráðuneytið hakkað og tveimur rússneskum fánum bætt við eða er vanþekking Trump-stjórnarinnar svo mikil allt niður á lægstu stig?“

Á miðri myndinni sést, vegna litanna, það sem líkist tveimur rússneskum fánum sitt hvorum megin við stjörnurnar.  En það er rétt að hafa í huga að litirnir passa einnig við litina í bandaríska þjóðfánanum.

Margir aðrir hafa veitt þessu athygli og hafa skemmt sér vel yfir þessu.

„Eru Bandaríkin opinberlega orðin „oblast“ (hérað í Rússlandi, innsk. blaðamanns). Er það, það sem er í gangi,“ skrifaði einn.

„Er þetta hróp á hjálpar, er ykkur haldið föngnum af Rússlandi? Setjið tvo rússneska fána í viðbót til að segja já,“ skrifaði annar.