„Ég er ekki hættur. En þetta er komið gott í bili. Ég stefni á aðra upper lip lift eftir sumarið. Þá er tekinn bara biti af húðinni hérna undir nefinu og bara fært efri vörina upp og saumarnir hérna bara undir nefinu, þannig að það sést minna. Mig langar að taka aðeins meira og þú veist, eftir smá tíma getur efri vörin sigið aðeins aftur niður. Nú er ég ennþá með svona bólgur í húðinni. Ég þarf að bíða aðeins. Það er ekki komið ár síðan ég fór í þessa aðgerð.
Ég er góður í bili og svo bara upkeap með fyllingarefni og bótox,“

segir Viktor Anderson aðspurður um hvort hann sé hættur að fara í fegrunaraðgerðir. Viktor starfar sem hjúkrunarfræðingur Landspítalanum. Viktor vakti nýverið athygli fyrir þættina Tilbrigði um fegurð. Í viðtali við Kiddu Svarfdal í Fullorðins segir Viktor frá lífi sínu og þeim áskorunum sem hann hefur tekist á við.

Viktor fer reglulega í bótox og aðspurður um hversu oft hann fari:

„Bótox fer ég fjórum sinnum til fimm sinnum á ári. Ég þarf að fara oft. Ég er búinn að nota bótox núna í tíu ár, þannig að ég er farinn að mynda þol fyrir því, þannig ég þarf meira. Fyllingarefnið fer ég svona einu sinni til tvisvar á ári. Ég set bótox hérna í ennið. Ég set á milli augabrúnanna, hérna fyrir ofan augabrúnirnar, hérna í kringum augun. Hérna yfir varirnar og í þessa vöðva hér og í platysma vöðvann hérna. Ég er alltaf með smá hreyfingu.“

Viktor segist ná að hreyfa andlitið meira með tímanum.

„Maður var einu sinni meira frosinn.“

Viktor segist alltaf fara á sömu stofu og vera sáttur þar. Hann er búinn að fara á námskeið að gera bótox og fyllingarefni.

„Ég myndi kannski alveg geta gert botoxið, en ég held eins og er myndi ég ekki treysta sjálfum mér að gera fyllingarefni. Þú veist, ég vinn ekki við þetta og ég er ekkert búinn að vera að halda þekkingunni minni við. En ég fór sem sagt síðastliðinn nóvember á þessi námskeið.“

Aðspurður um hvort geti ekki verið hættulegt að framkvæma slíkar meðferðir á sjálfum sér segir Viktor:

„Já, ef maður náttúrlega er eitthvað að fara missa sig í þessu. En jú maður verður auðvitað að passa, bara eins og ef maður er að gera þetta við aðra.“