KA vann sinn fyrsta leik í um mánuð og skoraði kærkomið mark í Bestu deild karla á laugardag.

Liðið tók á móti nýliðum Aftureldingar og vann 1-0 sigur með glæsimarki Hallgríms Mar Steingrímssonar. Akureyringar voru aðeins með fimm stig fyrir leik eftir sjö umferðir og sigurinn því kærkominn.

KA hefur bætt varnarleik sinn í síðustu leikjum, en leikurinn á undan fór 0-0, gegn ÍBV. Í gær fylgdi sigurmark með en þetta var fyrsta mark liðsins í deildinni í 388 mínútur. Það var vakin athygli á þessu í Stúkunni á Stöð 2 Sport í gær.

KA er áfram í fallsæti en með jafnmörg stig og ÍBV, sem er í sætinu fyrir ofan, og stutt frá pakkanum sem er fyrir miðri deild.