,,Það var mikið af hlutum sagt, mér fannst félagið ekki verja mig,“ sagði Romelu Lukaku framherji Inter um síðustu mánuði sína hjá Manchester United. Hann er ósáttur við það hvernig félagið kom fram við sig.

Í nokkra mánuði voru sögusagnir í enskum blöðum um að United vildi selja Lukaku, hann hefði haft áhuga á að vera áfram ef félagið hefði drepið þessar sögusagnir.

,,Það voru endalaust af sögum, að ég væri að fara og að félagið vildi ekki hafa mig. Það kom ekki neinn út og drap þessar sögur. Þetta voru þrjár eða fjórar vikur, ég beið eftir því að einhver myndi svara. Það gerðist ekki.“

Lukaku fékk nóg af sögum um sjálfan sig og bað um að fara. ,,Ég ræddi við félagið, sagði þeim að það væri betra að ég færi annað. EF félagið vill ekki verja leikmann eftir allar þessar sögusagnir, ég vildi bara heyra að Rom ætti að berjast fyrir sínu sæti.“

,,Ég hugsaði eftir 2-3 vikur, hver er að leka þessu í fjölmiðla? Ekki ég, ekki umboðsmaður minn. Ég sagði þeim að þetta væri ekki góður staður fyrir mig að vera á.“

,,Ég er ekki heimskur, félagið heldur að við séum heimskir. Við erum það ekki, við vitum hverjir leka þessu í fjölmiðla. Ég sagði þeim að þetta væru ekki góð vinnubrögð.“