Willum Þór Þórsson, þjálfari KR, var súr í kvöld eftir 1-0 tap gegn Grindavík í fimmtu umferð Pepsi-deildar karla.

Eina mark leiksins skoraði Andri Rúnar Bjarnason úr vítaspyrnu en Willum var óánægður með það sem fór fram fyrir vítaspyrnudóminn.

,,Auðvitað er það í svona jöfnum leikjum þar sem hvorugt liðanna gefur mikil færi á sér þá getur þetta oltið á ákvörðunum hér og þar. Þetta var afdrifarík ákvörðun í lok leiks þegar fjórði dómarinn ákvað að dæma leikinn,“ sagði Willum.

,,Aðdragandinn að aukaspyrnunni fyrir vítið er sérstakur. Finnur vinnur boltann og er bara með hann og dómarinn inná vellinum dæmir ekki og þá ákveður fjórði dómari að grípa í taumana og ákveður að dæma aukaspyrnu. Mjög sérstakt.“

,,Þeir eru í sambandi og hann kallar á hann og segir að þetta sé aukaspyrna. Ég tek það fram að þetta er ákvörðun og atburðarrás sem verður til þess að þeir taka aukaspyrnu inn á teiginn og komast inn í okkar teig.“