Helgi Fannar og Hörður Snævar gerðu upp þriðju umferð Bestu deildar karla í Íþróttavikunni.

FH er aðeins með eitt stig eftir þrjá leiki, en liðið er mikið breytt frá því í fyrra og byggir á ungum leikmönnum. Jóhannes Karl Guðjónsson tók auðvitað við sem þjálfari í vetur.

„Manni finnst bara minna benda til viðsnúnings núna, ef þú horfir í gæði leikmannahópsins og þeir voru með refinn Heimi Guðjóns í fyrra,“ sagði Helgi eftir að hann benti á að FH hafi einnig farið hægt af stað í fyrra.

„FH er að fara alla leið í sinni stefnu og við sjáum það bara á ungu liði þeirra. Svo verður bara að koma í ljós hvort þetta er nógu gott,“ sagði Hörður.

FH spilar fyrstu fjóra leiki mótsins á útivelli þar sem grasvöllur liðsins er ekki tilbúinn.

„Þeir byrja mótið á fjórum útileikjum. Er eðlilegt að í efstu deild byrji eitthvað lið á fjórum útileikjum? Og í seinni umferðinni fá þeir nokkra í röð á heimavelli. Mér finnst skrýtið að við getum verið með mótið svona uppsett í efstu deild,“ bætti hann við.

„Það er auðvitað fyrst og fremst við liðin að sakast sem bjóða ekki upp á betri velli,“ benti Helgi þá á.

Þátturinn er í spilaranum.