Leitin að nýjum knattspyrnustjóra hjá Manchester United er í fullum gangi og nú er orðið skýrara hverjir stýra ferlinu á bak við tjöldin.

Samkvæmt enskum miðlum eru það framkvæmdastjórinn Omar Berrada og yfirmaður knattspyrnumála,  Jason Wilcox sem leiða leitina að næsta stjóra félagsins.

Þeir vinna náið saman að mati á mögulegum kostum og framtíðarsýn liðsins, en félagið er á mikilvægu tímamótastigi eftir sveiflukenndan árangur undanfarin misseri.

Christopher Vivell, yfirmaður leikmannaleitar, er einnig sagður hafa sterka rödd í ferlinu. Hann leggur mat á hvaða þjálfari henti best leikmannahópnum og þeirri uppbyggingu sem félagið stefnir að á næstu árum.

Endanleg ákvörðun er þó í höndum meðeigandans Sir Jim Ratcliffe. Hann fær allar helstu tillögur lagðar fyrir sig og tekur lokaákvörðun um hver tekur við stjórnartaumunum á Old Trafford.

Manchester United vill vanda valið og finna stjóra sem getur skilað félaginu aftur í toppbaráttu bæði á Englandi og í Evrópu. Michael Carrick stýrir liðinu nú tímabundið.