Crystal Palace vill tryggja framtíð varnarmannsins Maxence Lacroix hjá félaginu, sér í lagi í ljósi áhuga frá Liverpool og Chelsea.

Samkvæmt Teamtalk íhugar Palace að bjóða Frakkanum bættan samning til að verðlauna frammistöðu hans og fæla jafnframt önnur félög frá. Er hann þó með samning til 2029 sem stendur.

Lacroix hefur verið einn besti varnarmaður Palace á tímabilinu og er nú metinn á um 50 milljónir punda.

Þessi 25 ára gamli miðvörður kom frá Wolfsburg árið 2024 og hefur vakið athygli á Englandi fyrir hraða sinn, styrk og hversu góður hann er á boltanum.

Liverpool og Chelsea eru bæði sögð fylgjast grannt með stöðu hans, en Palace vill senda skýr skilaboð með því að endursemja.