Breiðablik er að reyna að fá Hinrik Harðarson úr norska boltanum áður en félagaskiptaglugganum lokar.

Albert Brynjar Ingason sagði frá þessu í Dr. Football og jafnframt að Blikar hafi tvisvar sinnum reynt við framherjann undanfarið, án árangurs enn sem komið er.

Breiðablik er í leit að framherja en Albert segir ólíklegt að Hinrik komi heim sem stendur.

Hinn 21 árs gamli Hinrik er á mála hjá Odd í norsku B-deildinni og vill kappinn berjast fyrir sæti sínu þar.

Hinrik lék með ÍA er hann var seldur til Noregs, en þar áður spilaði hann með Þrótti R. í meistaraflokki.

Breiðablik er með fimm stig eftir þrjá leiki í Bestu deildinni. Sóknarleikurinn hefur einmitt þótt heldur bitlaus.