Arsenal fylgist náið með stöðu enska bakvarðarins Tino Livramento hjá Newcastle United og gæti lagt fram tilboð í leikmanninn í sumar, samkvæmt fréttum frá Telegraph.
Livramento, sem er landsliðsmaður Englands, á eftir tvö ár af samningi sínum við Newcastle þegar tímabilinu lýkur. Samkvæmt fréttinni hefur hann enn sem komið er ekki sýnt mikinn áhuga á að framlengja samning sinn við félagið, sem hefur vakið athygli annarra stórliða.
Arsenal er sagt vera eitt þeirra félaga sem fylgist grannt með þróun mála. Lundúnaliðið vill styrkja varnarlínuna fyrir næsta tímabil og telja forráðamenn félagsins að Livramento gæti verið góður kostur í hægri bakvarðarstöðuna.
Hinn 22 ára gamli varnarmaður hefur verið fastamaður í liði Newcastle á tímabilinu og vakið athygli fyrir hraða sinn og sóknarstyrk.
Ef Livramento ákveður að framlengja ekki samning sinn gæti Newcastle staðið frammi fyrir þrýstingi um að selja hann áður en samningur hans rennur út.
