Andre Onana hefur sætt mikilli gagnrýni frá stuðningsmönnum Trabzonspor eftir 3-2 tap á heimavelli gegn toppliði Fenerbahce um helgina.

Markvörðurinn, sem er á láni frá Manchester United, fékk á sig þrjú mörk úr þremur skotum á markið í leiknum. Hann fékk þá gult spjald í leiknum einnig, til að bæta gráu ofan á svart.

Trabzonspor situr í þriðja sæti tyrknesku úrvalsdeildarinnar, en tapið dró verulega úr titilvonum liðsins. Onana hóf dvöl sína í Tyrklandi af krafti og var valinn maður leiksins í sínum fyrsta leik, en frammistaðan hefur dalað síðustu vikur.

Hefur hann fengið að heyra það frá bæði stuðningsmönnum og fjölmiðlum. Lánsdvölin gengur því ekki eftir væntingum, en Onana tókst heldur ekki að heilla í treyju United.