Karólína Lea Vilhjálmsdóttir var að vonum svekkt með tap Íslands gegn Finnum í fyrsta leik EM hér í Sviss í kvöld.

Finnland vann leikinn 1-0. Íslenska liðið fann aldrei taktinn í fyrri hálfleik og missti Hildi Antonsdóttur af velli með rautt spjald snemma í þeim seinni.

„Það fór einhvern veginn allt úrskeiðis í kvöld. Fyrsti leikur á EM getur farið svona, við verðum að byggja ofan á góðu hlutina,“ sagði Karólína við 433.is eftir leik.

„Glódís þurfti að fara út af í hálfleik. Það er ekki kjörstaða. Svo missum við okkar ryksugu á miðjunni, það var erfitt að missa Hildi út af líka. Svo erum við ekki að skapa okkur nógu mikið.“

Eins og Karólína segir fór Glódís fyrirliði af velli. Var það vegna veikinda, ekki meiðsla sem margir óttuðust að hefðu tekið sig upp á ný.

„Mögulega var hún fersk en svo fer allt úrskeiðis. Hún er búin að vera rosalega slöpp undanfarna daga og greyið, ég hef aldrei séð hana svona veika.“

Hildur fékk sitt seinna gula spjald eftir að hafa stigið á leikmann Finna í kjölfar þess að Karólína virtist brjóta af sér.

„Ég stíg á hana og hefði alveg tekið þetta gula spjald á mig. Þetta var óheppni og ekki við Hildi að sakast,“ sagði Karólína sem horfir jákvæð fram veginn á leikina við Sviss og Noreg.

„Það er ekki annað hægt en að vera bjartsýnn. Það eru tveir leikir eftir, vonandi fleiri. Þetta var smá slys í kvöld og við verðum að byggja áfram ofan á það sem við gerðum vel.“