Ægir Þór Sævarsson er 13 ára og glímir við sjaldgæfan vöðvarýrnunarsjúkdóm sem kallast Duchenne. Ægir hefur undanfarin ár staðið fyrir vitundarvakningu um Duchenne og aðra sjaldgæfa sjúkdóma ásamt móður sinni, Huldu Björk Svansdóttur. Á föstudögum dansa þau saman og deila dansinum á sérstaka Facebook-síðu sem þau halda úti til að halda utan um vitundarvakninguna, Dancing for Duchenne- Ægis journey.
Með því vilja mæðginin sýna að það sé alltaf hægt að finna gleðina í lífinu, sama hvað á dynur, þó það sé jafnvel bara í stutta stund hvert sinn. Margir þekktir einstaklingar hafa dansað með þeim mæðginum, nú síðast Valkyrjurnar þrjár.
Draumur Ægis frá fimm ára aldri rættist í gær þegar hann hitti átrúnaðargoð sitt, fótboltakappann Lionel Messi.
Forseti FIFA, Gianni Infantino, deilir hjartnæmu augnablikinu á Instagram.
„Það hlýjar mér sannarlega um hjartaræturnar að sjá svona stundir. Gleðin í andliti hans er eitthvað mjög sérstakt.
Ægir er 13 ára og þjáist af Duchenne vöðvarýrnunarsjúkdómi (DMD), hann er ótrúlega hugrakkur svo ég er himinlifandi að við gátum séð til þess að hann gæti uppfyllt ævilangan draum sinn um að hitta fótboltahetjuna sína, Lionel Messi, á HM félagsliða. Ég óska honum og móður hans Huldu alls hins besta.
Innilegar þakkir til Lionel Messi fyrir góðvild hans, næmi og fyrir að sýna enn og aftur hvernig fótbolti getur fært fólki hamingju með einföldum hætti og gjörðum.“
View this post on Instagram
„Í dag er dagur sem við munum geyma í hjörtum okkar að eilífu. Við upplifðum eitthvað sannarlega ógleymanlegt, stund sem var eins og töfrar. Þökk sé ótrúlega góðhjarta og örlátum sálum fékk Ægir að hitta hetjuna sína, Lionel Messi, eitthvað sem hann hefur dreymt um síðan hann var aðeins fimm ára gamall.
Sem lítill drengur dreymdi Ægir um að verða knattspyrnumaður. En lífið hafði aðrar áætlanir. Þegar maður er foreldri barns með sjaldgæfan sjúkdóm verða stundir eins og þessi helgar.
Að sjá augu hans lýsast upp, andlitið geisla af gleði og horfa á hann fá faðmlag og eiginhandaráritun frá Messi sjálfum. Ég gat ekki haldið aftur af tárunum. Þetta var ekki bara fundur, þetta var draumur sem rættist, græðandi stund og áminning um alla þá fegurð sem enn er til í þessum heimi.Messi takk fyrir að vera svona góðhjartaður og auðmjúkur maður. Þú gerir þér kannski aldrei alveg grein fyrir því hvað þetta þýddi fyrir okkur, en þú gafst drengnum okkar eitthvað sem við munum aldrei gleyma. Og þetta aukaspyrnumark?“
segir Hulda í færslu á Facebook-síðu þeirra og þakkar öllum þeim sem gerðu kraftaverkið að veruleika.
„Ann Pierce og Pedro Coley hjá FIFA
Frábæra starfsfólkið á Mercedes Benz leikvanginum
Salman Azouzi fyrir að hjálpa til við að gera hið ómögulega mögulegt
Lífið verður ekki mikið betra en þetta.“
