Dómaradagur ungra dómara var haldinn í fyrsta sinn sunnudaginn 1. júní í höfuðstöðvum KSÍ og á Þróttheimum, æfingavöllum Þróttar í Laugardal. 15 dómarar voru samankomnir undir handleiðslu sérfræðinga í dómaramálum.

Dómararnir fengu fyrirlestra frá FIFA dómurunum Vilhjálmi Alvar Þórarinssyni og Jóhanni Inga Jónssyni ásamt því að hlýða á erindi frá Gunnari Jarli Jónssyni, dómaraþjálfara KSÍ og Frosta Viðari Gunnarssyni, aðstoðardómaraþjálfara KSÍ.

Dómararnir fóru á verklega æfingu þar sem þeir nutu leiðsagnar Bríetar Bragadóttur, FIFA dómara og Gylfa Más Sigurðssonar, FIFA aðstoðardómara ásamt því að Milos Petrovic, Gunnar Jarl Jónsson og Frosti Viðar Gunnarsson voru þeim til halds og trausts.

Það er mikilvægt fyrir KSÍ og félögin að hlúa vel að ungum dómurum og átta sig á að það eru mörg hlutverk sem þarf að sinna í knattspyrnunni og dómgæsla er eitt þeirra. Hlutverk dómara er í senn krefjandi, gefandi en umfram allt skemmtilegt og þóttu dómararnir standa sig með stakri prýði og engin vafi á að þarna eru á ferðinni framtíðar dómarar.

Á haustmánuðum mun KSÍ bjóða upp á dómaradag fyrir stúlkur á aldrinum 14-20 ára og við hvetjum félögin til að bjóða stúlkum upp á gott umhverfi og leiðsögn þegar þær stíga sín fyrstu skref.