Viktor Gyokeres mun gera allt til að komast frá portúgalska stórliðinu Sporting í sumar.
Hinn 27 ára gamli Gyokeres er talinn á förum en vill hann meina að Sporting hafi sett á sig of háan verðmiða. Samkvæmt fjölmiðlum í Portúgal telur sænski framherjinn sig hafa gert heiðursmannasamkomulag við félagið síðasta haust um að hann mætti fara á 60 milljónir punda. Nú biðji Sporting hins vegar um 70 milljónir punda.
Gyokeres er virkilega ósáttur og portúgalskir miðlar segja hann staðráðinn í að leika aldrei aftur fyrir félagið og að hann sé til í að fara í verkfall til að koma félagaskiptum í gegn í sumar.
Gyokeres á þrjú ár eftir af samningi sínum við Sporting og er formleg klásúla í samningi hans upp á 85 milljónir punda. Miðað við heiðursmannasamkomulagið sem sagt er í gildi ætti hann hins vegar að fá að fara fyrir minna.
Undanfarna daga hefur Gyokeres verið sterklega orðaður við Manchester United, þar sem fyrrum stjóri hans hjá Sporting, Ruben Amorim, er við stjórnvölinn. Einnig hefur hann verið orðaður við Arsenal, sem er á höttunum eftir níu.
Gyokeres átti ótrúlegt tímabil með Sporting, skoraði 54 mörk í 52 leikjum.
