Tanja Tómasdóttir, framkvæmdarstjóri Breiðabliks, var á dögunum gestur í hlaðvarpinu Bókakjallarinn sem Þórhallur Gunnarsson fyrrum fréttamaður heldur úti.

Tanja hefur starfað sem framkvæmdarstjóri Breiðabliks síðustu ár en áður var hún lögfræðingur hjá tryggingarfélagi. Í viðtalinu fer hún um víðan völl.

Eitt af því sem Tanja ræðir er draumur hennar að starfa sem framkvæmdarstjóri Inter Miami í MLS deildinni í Bandaríkjunum. Ástæðan er aðdáun hennar á David Beckham, eiganda félagsins.

„Já það kom upp fyrir nokkrum árum þegar hann sagði frá þeirri hugmynd sinni að stofna félagið. Upphaflegi draumurinn var að vera lögfræðingur hjá Manchester United,“ segir Tanja en í viðtalinu kemur fram að Beckham hafi frá unga aldri verið átrúnaðargoð hennar.

„Þegar Beckham fór að stofna sitt eigið félagið þá fannst mér það tilvalið tækifæri til að kynnast honum. Það hefur blundað í mér þessi draumur að starfa fyrir knattspyrnufélög,“ segir Tanja, hún segist þó ekkert hafa gert í því að reyna að koma sér á framfæri við eigandinn.

„Hvort ég fari til Miami er spurning, ég hef ekki látið vita af mér.“

Hún segist þó vilja starfa áfram fyrir Breiðablik næstu árin og segir. „Það eru verk óunninn þar.“