Donald Trump, forseti Bandaríkjanna, hyggst þrengja ferðareglur verulega fyrir HM 2026 og krefja alla erlenda ferðamenn um að afhenda fimm ára samfélagsmiðlasögu sína áður en þeir fá að koma inn í landið, að því er Daily Mail greinir frá.

Bandaríkin, Mexíkó og Kanada halda mótið, sem verður það stærsta til þessa með 48 landsliðum og allt að 6,5 milljónum áhorfenda.

Trump hefur áður boðað það sem hann kallar heilbrigðar takmarkanir til að vernda Bandaríkjamenn. Í kjölfarið voru sett ferðabönn á borgara frá 19 ríkjum, þar á meðal Haítí og Íran, sem bæði hafa tryggt sér sæti á HM.

Samkvæmt nýju frumvarpi vill Trump að allir ferðamenn, jafnvel þeir sem koma frá ríkjum með vegabréfsáritunarundanþágu, á borð við Bretland og Þýskaland, verði skyldaðir til að afhenda samfélagsmiðlaupplýsingar fyrir komu.

Utanríkisráðuneytið hefur þegar mælt fyrir um að ferðamenn geri aðganga sína opinbera og í sumar var norskur ferðamaður sagður hafa verið sendur frá landamærum vegna gríndmyndar á símanum sínum.

Trump-stjórnin hefur einnig beint því til innflytjendaeftirlits að leita í samfélagsmiðlum umsækjenda um vegabréfsáritun eftir mögulegum færslum þar sem hallar á Bandaríkin.