„Þetta er mikilvægur leikur, við eigum góðan möguleika á að komast í umspil. Við þurfum góð úrslit á morgun til að búa til úrslitaleik gegn Úkraínu á sunnudag,“ sagði Arnar Gunnlaugsson landsliðsþjálfari Íslands fyrir leikinn gegn Aserbaídsjan í undankeppni HM á morgun.

Íslenska liðið kom til Baku á mánudag og hefur undirbúið sig af kostgæfni fyrir leikinn. „Baku er frábær borg, gott land. Við eigum von á öflugu liði Aserbaídsjan,“ sagði Arnar.

Fernando Santos var rekinn sem þjálfari Aserbaídsjan eftir 5-0 tap gegn Íslandi í september.

„Þeir eru með betra skipulag, þeir vita betur hvernig þeir eiga að spila varnarleik og hvernig þeir geta sótt hratt. Þeir hafa bætt sig mikið, allir heima á Íslandi halda að 5-0 sigurinn hafi verið auðveldur. Þetta var bara frábær leikur hjá okkur, ég vil frekar ræða um góðan leik okkar en slæman leik Aserbaídsjan. Þeir eru með nýjan þjálfara og eru að búa til góðan strúktur fyrir undankeppni næsta Evrópumóts.“

Arnar var spurður að því hvort hann hefði áður lent í því að þjálfari væri rekinn eftir leik gegn sér.

„Þetta var ekki í fyrsta skiptið, það hefur gert nokkrum sinnum áður. Þegar þú tapar gegn Íslandi þá þarf þjálfarinn að borga fyrir það, því fólk lítur á Íslands sem slakari andstæðing.“

Mikael Neville Anderson er frá vegna meiðsla og kemur ekki til liðs við hópinn. „Mikki er því miður off, við skildum hann eftir í Svíþjóð. Við fengum þær fréttir að hann er ekki í standi til að komast. Logi er búinn að vera smá lasinn en ætti að vera klár á morgun.“

Völlurinn í Baku furðulegur en varamannabekkirnir eru nánast ofan í vellinum. Arnar efast um hvort þetta standist lög og reglur.

„Fínasta gras, það verða mikil læti á morgun. Skrýtin fjarlægð frá bekknum að vellinum, grasið er gott og grænt. Þetta er óvenjulegt, ég veit ekki hvort þetta standist lög eða reglur. Við kærum kannski ef úrslitin verða okkur ekki hagstæð.“