Helgi Fannar Sigurðsson skrifar frá París

Sverrir Ingi Ingason, lykilmaður íslenska landsliðsins, hefur ekkert komið við sögu í fyrstu leikjum nýs tímabils með Panathinaikos í Grikklandi. Hann er staðráðinn í að breyta því.

Miðvörðurinn er nú staddur með íslenska liðinu í París, þar sem liðið mætir Frakklandi í ansi krefjandi leik annað kvöld. Um annan leik í undankeppni HM er að ræða. Ísland vann frábæran 5-0 sigur á Aserbaísjan í fyrstu umferð en Frakkar unnu Úkraínu.

Sverrir er ánægður að vera kominn til móts við landsliðið og að spila en vill hann auðvitað sjá stöðuna breytast þegar hann snýr aftur til Panathinaikos.

„Ég hef bara ekki verið að spila. Hann hefur bara verið að velja aðra. Svona er fótboltinn, stundum ertu inni og stundum ertu úti, það er bara undir mér komið (að koma mér aftur í liðið),“ segir Sverrir.

„Það er mjög flott fyrir mig að fá þessa leiki núna, koma mér af stað. Svo vonandi get ég farið að spila meira á næstu vikum, það er stefnan. Maður þarf að vera klár þegar kallið kemur.“

Ítarlegt viðtal við Sverri um komandi leik og fleira er í spilaranum.