Helgi Fannar Sigurðsson skrifar frá Sviss

Leikmenn íslenska landsliðsins fengu frí í gær til að eyða tíma með fjölskyldum sínum eftir erfiða daga á EM, þar sem Ísland er þegar úr leik þó einn leikur sé eftir.

Ísland tapaði fyrsta leik mótsins gegn Finnum og eftir tap gegn Svisslendingum í leik tvö var ljóst að draumurinn á að fara upp úr riðlinum er úti.

„Þetta var ótrúlega erfitt andlega. Dagurinn eftir var mjög erfiður en svo fengum við góðan dag með fjölskyldunni og náðum að hreinsa hugann. Við áttum svo góða æfingu í dag og erum klárar í leikinn á morgun,“ sagði Cecilía Rán Rúnarsdóttir landsliðsmarkvörður á blaðamannafundi í dag.

Ísland mætir Noregi klukkan 21 annað kvöld, áður en liðið heldur heim á leið.