Stjórn KSÍ hefur verulegar áhyggjur af framkvæmdum Reykjavíkurborgar á bílastæði fyrir utan Laugardalsvöll, þar á að rísa skólaþorp. Þetta kemur fram í fundargerð KSÍ sem hefur verið birt, fundurinn fór fram 19 júní.

Þetta kemur fram í fundargerð KSÍ en þar er lýst yfir vonbrigðum með samráð og samvinnu skipulagsyfirvalda með KSÍ í þessu viðkvæma máli.

„Nokkuð hefur verið fjallað um væntanlegt skólaþorp sem Reykjavíkurborg áætlar að muni rísa í Laugardalnum, nánar tiltekið á bílastæði við Laugardalsvöll. Axel Kára lögfræðingi KSÍ var falið að skoða málið og fór hann stuttlega yfir hverjar þessar áætluðu framkvæmdir væru og til hvaða andsvara KSÍ hefur gripið. Í máli Axels kom fram að ekki fáist skýr svör frá borginni, að ekki sé búið að skipuleggja svæðið að fullu en engu að síður eru hafnar framkvæmdir og undirbúningsvinna skv. gildandi deiliskipulagi. KSÍ hefur fengið frest til að skila enn frekari athugasemdum til Reykjavíkurborgar,“ segir í fundargerð KSÍ.

KSÍ hefur lengi hýst skólastarf fyrir Reykjavíkurborg þegar framkvæmdir eða mygla koma upp í skólum.

„Stjórnarmenn ræddu möguleg næstu skref og ræddu einnig um hversu hart KSÍ eigi að ganga fram til að mótmæla fyrirhuguðum framkvæmdum. Rætt um samlagsáhrif með því m.a. að ræða við önnur sérsambönd með starfsemi í Laugardalnum og við ÍSÍ. KSÍ hefur t.a.m. lagt til við borgina að skoða heldur varanlega lausn og samlegðaráhrif við uppbyggingu þjóðarleikvangsins Laugardalsvallar með því að byggja skólann samhliða og í sömu byggingu og stúka við suðurhlið Laugardalsvallar. KSÍ hefur skilning á erfiðleikum í skólamálum í Reykjavík og aðstaða á Laugardalsvelli hefur reglulega verið nýtt í samráði og samstarfi KSÍ og borgaryfirvalda, sem hefur vissulega þrengt mjög að starfsemi KSÍ.“

Margir í stjórn KSÍ hafa áhyggjur af þessu. „Margir tóku til máls og lýstu yfir miklum áhyggjum af þessum framkvæmdum og verulega neikvæðum áhrifum þeirra á þjóðarleikvanginn í knattspyrnu og þá viðburði sem þar fara fram og í nágrenni hans, og neikvæðum áhrifum á starfsemi KSÍ. Stjórn KSÍ lýsir yfir miklum áhyggjum af fyrirhuguðum framkvæmdum og byggingu skólaþorps á svæði Laugardalsvallar, og lýsir jafnframt yfir vonbrigðum með samráð og samvinnu skipulagsyfirvalda með KSÍ í þessu viðkvæma máli.“