Í aðdraganda EM í knattspyrnu kvenna hefur Eimskip, einn af bakhjörlum KSÍ, sent frá sér nýja ímyndarauglýsingu sem vekur athygli fyrir óvæntan og áhrifaríkan endi þar sem víkingaklappið fær nýja merkingu. Með auglýsingunni vill félagið hvetja A landslið kvenna fyrir EM 2025 og um leið að styrkja ásýnd og sýnileika kvennaknattspyrnunnar. Þau markmið endurspegla einnig áherslur Eimskips í jafnréttismálum, eins og segir í tilkynningu.
Auglýsingin, sem ber yfirskriftina „Stelpurnar okkar – Örugg sending í höfn“, leikur sér að tengingum milli flutninga og fótbolta. Taktfast víkingaklappið og HÚH óma í gegnum myndbandið. En þegar íslenska kvennalandsliðið gengur út á nýja þjóðarleikvanginn, áhorfendur rísa á fætur og Tólfan leiðir stemninguna þá kemur hið óvænta í ljós: það sem virtist vera HÚH reynist vera HÚN, yfirlýsing til heiðurs stelpum og konum í knattspyrnu.
Í myndbandinu mætast heimar ungra stelpna í fótbolta, ungra kvenna á leið á völlinn, stuðningsfólks í gleði, og flutningar: skip Eimskips siglir inn fallegan fjörð og flutningabíll sést aka um íslenskt landslag og öll leiðin liggur að þjóðarleikvanginum þar sem stelpurnar okkar stíga á völlinn
„Við vildum fanga kraftinn, stoltið og þá samstöðu sem kvennalandsliðið kveikir í þjóðinni þegar það stígur á stóra sviðið. Þegar hugmyndin að auglýsingunni um að nota HÚN í stað HÚH kom þá stukkum við á hana. Hún speglaði okkar sýn og markvissar áherslur í jafnréttismálum, og við ákváðum að gera hana að veruleika“, segir Harpa Hödd Sigurðardóttir, framkvæmdastjóri mannauðs- og samskiptasviðs hjá Eimskip. Samstarf Eimskips og KSÍ hófst fyrr á árinu og nær til allra landsliða Íslands til ársloka 2027.
„Við erum stolt af því að styðja við íslenska knattspyrnu bæði með flutningum fyrir nýjan þjóðarleikvang og í gegnum grasrótarstarf um allt land. Fátt skapar jafnsterka stemningu og samstöðu í þjóðarsálinni og þegar íslenskt landslið keppir á stórmóti. Innan Eimskips ríkir því spenna og eftirvænting að fylgjast með stelpunum okkar etja kappi á EM í Sviss í sumar,“ segir Vilhelm Már Þorsteinsson, forstjóri Eimskips.
