Segja má að Óskar Hrafn Þorvaldsson hafi slegið í gegn á RÚV síðustu daga sem sérfræðingur ríkissjónvarpsins yfir Evrópumótinu í knattspyrnu.

Óskar er ekki þekktur fyrir að liggja á skoðunum sínum og hann gerði það ekki í dag þegar hann fór yfir leik Englands og Danmerkur.

„Ef það er eitthvað lið sem átti að vinna þennan leik, þá voru það Danir. Og þó það hefði nú ekki bara verið nema til að sparka í rassgatið á Gareth Southgate.“ sagði Óskar á RÚV um þjálfara enska landsliðsins.

Enska landsliðið fann sig engan veginn í leik gegn Dönum á Evrópumótinu í knattspyrnu, leiknum lauk með 1-1 jafntefli.

Englendingar komust yfir í fyrri hálfleik með marki frá Harry Kane, óverðskuldað var það en Kyle Walker gerði vel í undirbúningi marksins. Þegar um tíu mínútur voru eftir af fyrri hálfleik jafnaði Morten Hjulmand með frábæru marki. Hann skaut af 25 metra færi og boltinn í stöng og inn.

„Hvað átti Southgate að gera? Farðu bara úr að ofan eða eitthvað. Gerðu eitthvað! Sýndu að þú sért með lífsmarki. Hann er bara eins og 100 ára gamall prófessor í einhverjum háskóla,“ sagði Óskar í þrumuræðu sinni og hélt áfram.

„Það er ekkert þarna, engin ástríða eða neitt. Liðið hans er eiginlega eins leiðinlegt og hann lítur út fyrir að vera. Það er eins og þeim leiðist öllum. Það er eins og einhver sé að pína þá til að vera þarna. Ég skil þetta ekki. Þú verður bara að taka fokking handbremsuna og rífa hana af. Hættu þessu bulli,“ sagði Óskar

Óskar Hrafn er ekkert sérstaklega hrifinn af Gareth Southgate 😤😆 pic.twitter.com/uaET1yC18M

— RÚV Íþróttir (@ruvithrottir) June 20, 2024