Hákon Rafn Valdimarsson, landsliðsmarkvörður Íslands, spilaði sinn fyrsta keppnisleik fyrir enska úrvalsdeildarliðið Brentford í gær. Hann gerði vel svo eftir því var tekið.

Liðið heimsótti þá Colchester í enska deildabikarnum. Hákon hélt hreinu og varði víti í 0-1 sigri Lundúnaliðsins. Hákon var mikið í umræðunni á meðal stuðningsmanna Brentford erlendis á samfélagsmiðlum eftir leikinn í gær.

Meira
Sjáðu vítavörslu Hákonar í enska deildabikarnum

„Mögnuð frammistaða hjá Hákoni,“ skrifaði einn netverji. „Valdimarsson þú ert einstakur,“ skrifaði annar og fleiri tóku í sama streng. „Flottur fyrsti leikur hjá Hákoni. Hélt hreinu og varði víti.“

Einhverjir voru þá á því að Hákon ætti að fá traustið fram yfir Mark Flekken, sem er aðalmarkvörður Brentford og spilar leiki liðsins í úrvalsdeildinni sem stendur.

„Valdimarsson varði víti og hélt hreinu. Bank, bank Flekken,“ skrifaði einn. „Ég tæki Valdimarsson fram yfir Flekken,“ skrifaði annar.