Marc Guehi, landsliðsmaður Englands og leikmaður Crystal Palace, er ansi eftirsóttur af enskum stórliðum.
Hinn 23 ára gamli Guehi átti frábært tímabil með Palace og segir Daily Mail að Manchester United, Liverpool og Tottenham séu öll áhugasöm um hann.
Þar kemur þó einnig fram að Palace reyni að komast hjá því að missa hann og ætli að bjóða honum nýjan samning, en sá sem nú er í gildi rennur út eftir tvö ár.
Vilji Guehi ekki skrifa undir má búast við því að Palace setji um 65 milljóna punda verðmiða á miðvörðinn fyrir sumarið.
Guehi er nú staddur með enska landsliðinu á EM í Þýskalandi, en hann byrjaði fyrsta leik gegn Serbum.
