Viðar hefur mikið verið í umræðunni frá því hann gekk í raðir KA fyrir tímabil. Hann hefur verið inn og út úr liðinu og ekki enn byrjað deildarleik. Hann var ekki í hóp í sigri gegn Fram í bikarnum í gær og eftir leik sagði Hallgrímur Jónasson, þjálfari liðsins, að hann væri ekki að standa sig nógu vel á æfingum.
„Byrjunin í deildinni var slæm, ég kem ekki í góðu standi og ofan á það það var ég langt frá því að vera heill. Ég æfi vel og ég legg bara ennþá harðar að mér núna til þess að spila næstu leiki. Það tók lengri tíma en ég ætlaði mér að komast í form, ég myndi segja að það væri að koma núna, loksins. Haddi vill bara meira frá mér og þá mun ég leggja enn harðar af mér,“ segir Viðar við Fótbolta.net.
Meira
Kallar eftir ákvörðun í kjölfar þrálátrar umræðu um Viðar Örn – „Það er fíll í herberginu“
Einhver umræða hefur skapast í fótboltaheiminum um mætingu Viðars á æfingar KA og var hann spurður að því í viðtalinu hvort hann hafi misst af æfingu eða æfingum.
„Þetta er ekki svaravert og ég lít á þetta sem aðför,“ sagði Viðar þá, ómyrkur í máli.
Í dag sagði 433.is frá riftunarákvæði í samningi Viðars við KA sem tekur gildi í júlí. Hann var spurður út í þetta.
„Þegar ég fékk það tækifæri að fara í KA og skrifaði þar undir þá sagði ég að markmiðið væri að koma mér í form, skora fullt af mörkum og planið var að fara út aftur um sumarið. Spila aftur í útlöndum og klára minn atvinnumannaferil á góðum nótum. Ég var mun lengur í form heldur en ég bjóst við. Að mínu frumkvæði tókum við þá ákvörðun að ég ætti kost á því að fara út, sem mér finnst mjög eðlilegt fyrir þá leikmenn sem hafa áhuga á því að spila erlendis. Þetta er orðið svolítið þreytt hvernig þetta er sett upp allt saman,“ sagði Viðar.
