Jerome Rothen, fyrrum landsliðsmaður Frakklands og leikmaður Paris Saint-Germain, er enginn aðdáandi Kylian Mbappe og hefur oft gagnrýnt stórstjörnuna opinberlega.

Rothen hefur sjaldan verið jafn pirraður út í Mbappe og í dag en framherjinn hefur gert samning við Real Madrid og kveður frönsku höfuðborgina.

Mbappe sýndi lítinn lit undir lok síðasta tímabils sem leikmaður PSG en skemmti sér konunglega í 3-0 sigri gegn Lúxemborg með franska landsliðinu í vikunni.

Það fór virkilega í taugarnar á Rothen sem hikaði ekki við að skjóta föstum skotum á einn besta leikmann heims.

,,Það sem við sáum í leiknum gegn Lúxemborg er eitthvað sem við sáum ekki yfir allt tímabilið hjá PSG. Hvernig hann brosir og samræðurnar við stuðningsmenn, það er fótbolti,“ sagði Rothen.

,,Í heila fimm mánuði þegar Kylian gerir ekki nóg þá er það ekki vandamál þjálfarans, leiðtogans, forsetans eða stuðningsmanna. Þetta snýst um virðingu.“

,,Þegar þú setur sjálfan þig í flokk bestu leikmanna heims þá þarftu að vera með hugarfarið sem fylgir því. Þú þarft að berjast fyrir liðsfélagana, fyrir landið og fyrir félagið.“

,,Að mínu mati þá sveik hann okkur. Þetta tímabil var stórslys alveg frá byrjun. Ég er mjög reiður út í hann því þegar ég sé hann í franska landsliðsbúningnum með banana, það er ekki rétt.“