Arnar Gunnlaugsson þjálfari Víkings gerði sig sekan um vanmat þegar lið hans tapaði gegn HK. Þetta segir Mikael Nikulásson þjálfari KFA í Þungavigtinni.

Arnar ákvað að byrja með fjóra af sínum bestu leikmönnum á bekknum í 3-1 tapi gegn HK í Kórnum á sunnudag.

„Hann er ekki alveg sammála sér sjálfum, þetta var vanmat að setja lykilmennina á bekkinn í þessum leik. Þegar HK sér skýrsluna þá peppast þeir upp um 50 prósent í viðbót,“ sagði Mikael í Þungavigtinni.

Pálmi Rafn Arinbjörnsson var settur í markið fyrir Ingvar Jónsson sem er fyrsti kostur í mark Víkings.

„Útskýring Arnars um að hann spili í Evrópu ef Ingvar meiðist. Pálmi veit að hann er bara að fara að spila þennan eina leik, ég get viðurkennt að ég gerði nákvæmlega sömu mistök í fyrra. Þess vegna segi ég þetta, í leik sem við töpuðum. Það varð til þess að við fórum mögulega ekki upp, gaf markverði leik sem ég vildi gefa einn leik,“ segir Mikael um ákvörðun Arnars en KFA missti af sæti upp úr 2. deildinni í fyrra.

„Hann setur Ara Sigurpáls, Nikolaj Hansen og Aron Elís á bekkinn. Þetta er vanmat, mér fannst þetta ofboðslega skrýtið.“

Mikael finnur til með næstu andstæðingum Víkings sem er FH.

„Hann er gíraður, hann viðurkennir bara að HK hafi verið fínir. Ef Víkingur spila nógu vel þá vinna þeir HK, þetta var vanmat. Þetta er fyrsta klikkið í langan tíma, ég vorkenni FH að spila gegn Víkingi í Víkinni næstu helgi. Þetta var skellur fyrir þá, ef Víkingur tapar þessu móti á einu stigi í restina þá horfa menn á þennan leik.“