Pep Guardiola, stjóri Manchester City, hefur enga trú á því að Jurgen Klopp sé hættur þjálfun eftir að tíma hans hjá Liverpool lýkur.
Klopp mun yfirgefa Liverpool í sumar eftir níu ár hjá félaginu en þær fréttir komu mjög mörgum á óvart.
Klopp náði frábærum árangri með Liverpool á þessum níu árum en var fyrir það hjá Dortmund í Þýskalandi.
Guardiola er viss um að Klopp muni finna spennandi starf í framtíðinni en bendir á að hann hafi gott af því að taka sér smá pásu.
,,Ég er viss um að hann snúi aftur, hvar það verður veit ég ekki, aðeins hann veit það,“ sagði Guardiola.
,,Hann mun taka sinn tíma í að slaka á og horfa á hlutina með öðrum augum. Stundum er gott að taka sér pásu, hann ákveður hvað er best fyrir sjálfan sig.“
