Gylfi Þór Sigurðsson er frjáls maður eftir að lögreglan í Manchester og saksóknari þar í borg ákváðu að fella mál hans niður. Var Gylfi undir rannsókn í tæp tvö ár vegna gruns um kynferðisbrot.
Gylfi Þór var í farbanni í 637 daga í Bretlandi og hefur ekki spilað fótbolta á þeim tíma, samningur hans við Everton rann út síðasta sumar.
Óvíst er hvaða framtíðaráform Gylfi hefur en málið var tekið fyrir í þætti Gísla Marteins á RÚV í gærkvöldi.
„Það eru allir búnir að vera í sjokki í dag, hann er frjáls maður eftir tvö ár af martröð,“ sagði Gísli Marteinn.
Halldór Halldórsson, betur þekktur sem Dóri DNA tók þá til máls og taldi að Age Hareidi nýr þjálfari Íslands væri að fagna tíðindunum af máli Gylfa.
„Ég skal segja ykkur að þessi níræði Dani sem við vorum að ráða hlýtur að vera alveg heavy hress núna,“ sagði Halldór en Hareidi er 69 ára gamall og kemur frá Noregi.
Ræða Halldórs var ansi ástríðumikil eins og heyra má hér að neðan. „Þetta er agalegt, frá öllum hliðum séð. Maður er búinn að ímynda sér hann í stofufangelsi í Manchester eða á einhverjum stað sem drottinn hefur yfirgefið, núna er hann laus og vonandi kemur hann heim sem fyrst. Fara í FH og jafna sig aðeins þar,“ sagði Halldór og hélt síðan áfram.
„Ég veit bara að það að hann var í 637 daga, mátti ekki fara. Mátti ekki fara til Íslands, þetta hljómar ekki sanngjarnt. Hljómar ofboðslega klikkað, þá hljótum við að biðja um að réttlætið sé aðeins snarara í snúningum. Hann búinn, Everton, landsliðið, landsliðið fór í vaskinn á meðan þetta gerðist.“
