Það munaði ekki miklu að Moises Caicedo myndi gefast upp sem leikmaður Brighton eftir að hafa gengið í raðir félagsins 2021.

COVID faraldurinn var þá í raun upp á sitt versta en Caicedo ferðaðist til Englands frá heimalandi sínu, Ekvador.

Það tók miðjumanninn langan tíma að venjast nýju landi og ástandinu og íhugaði sterklega að snúa aftur heim.

Hann vakti síðar gríðarlega athygli hjá Brighton og leikur í dag með Chelsea – félagið keypti hann á 115 milljónir punda í sumar.

,,Ég kom til landsins þegar Covid var upp á sitt versta, áður en ég gat farið út úr húsi á Englandi var ég fastur á hóteli í tíu daga,“ sagði Caicedo.

,,Ég gat ekki hitt liðsfélaga mína, ég grét á hverjum einasta degi á þessu hóteli. Ég hringdi í mömmu og pabba því ég vildi fara aftur heim. Allt hérna var öðruvísi og ég vildi ekki vera hér.“

,,Þau sögðu mér að sýna styrk, að þetta væri minn draumur. Ég hlustaði á þau og að lokum þá leið mér betur og betur. Nú er ég hjá Chelsea og nýt þess að spila hvern einasta leik.“