Stuðningsmenn sænska landsliðsins í fótbolta þurftu að dúsa á vellinum í Belgíu til klukkan 04:00 á staðartíma þegar þeim var fylgt af vellinum með lögreglu.

Var þetta gert eftir að hryðjuverkamaður myrti tvo sænska stuðningsmenn sem voru á leið á leik Belgíu og Svíþjóðar sem fór fram í Brussel í gær.

Árásamaðurinn var drepinn af lögreglu í morgunsárið en hann var þá staddur á kaffihúsi í borginni og var vopnaður.

Yfirvöld í Belgíu rannsaka málið sem hryðjuverk og vegna þess var leik hætt þegar Belgía og Svíþjóð áttust við, en leikmenn Svíþjóðar sögðu við UEFA að þeir kærðu sig ekki um að spila seinni hálfleikinn og belgísku leikmennirnir tóku undir.

„Við lifum fyrir trú okkar, við deyjum fyrir trú okkar. Ég er að hefna mín fyrir múslima og nú hef ég drepið þrjá Svía. Ég þakka Guði, ég mun hitta hann og spámanninn glaður í bragði,“ sagði maðurinn á myndbandinu en eins og fyrr segir er talið að tveir hafi látist í árásinni. Einn er alvarlega særður.

Maðurinn er samkvæmt erlendum miðlum með tengsl við ISIS-samtökin.