Það varð ljóst fyrir helgi að Rúnar Kristinsson verður ekki áfram með KR og félagið því í leit að nýjum manni í brúnna. Óskar er uppalinn KR-ingur.
„Ég er KR-ingur og bjó fyrstu 23 ár ævi minnar í blokkunum hérna við völlinn. Auðvitað hefur alltaf verið draumur minn að stýra KR en hvenær og hvort það gerist. Núna eru menn að kveðja frábæran þjálfara og ég sé á eftir honum sem KR-ingur en mér finnst ótímabært að tala um það samningsbundinn Breiðabliki en ég er KR-ingur og vill þessu félagi allt það besta,“ sagði Óskar við Stöð 2 Sport eftir leik.
„Þetta eru ansi áhugaverð ummæli fyrir þjálfara sem var að tapa leik á móti þessu liði. Mér finnst þetta svolítið undarleg ummæli,“ sagði Jóhann Már Helgason í Dr. Football.
„Sem Bliki gerði þetta mann svolítið pirraðan, að vera nýbúnir að kasta leiknum frá okkur og svo fær maður þessi ummæli í smettið. Mér finnst þetta mjög spes og ég næ því ekki hvernig hann fór þangað, að segja þetta á þessum tímapunkti,“ sagði Hrafnkell Freyr Ágústsson.
Málið var einnig tekið fyrir í Þungavigtinni.
„Þetta eru athyglisverð ummæli eftir að hafa tapað 4-3. Er Óskar Hrafn í raunini ekki bara hættur í huganum?“ spurði Ríkharð Óskar Guðnason.
Kristján Óli Sigurðsson telur að verið sé að gera of mikið úr ummælunum.
„Hvaða liði á Íslandi öðru en KR ætti Óskar að taka við? Hann er uppalinn í KR og spilaði fyrir félagið. Hvaða annað lið ætti hann að dreyma um að þjálfa? Þarna er verið að búa til úlfalda úr mýflugu.“
Óskar hefur undnafarið verið orðaður frá Breiðabliki en það verður áhugavert að sjá hvað verður.
